මේ විදිහට නතරවෙයි කියලා හිතුවෙ නම් නෑ
ලොව පුරා මිලියන සිය ගණනක් පරිශීලකයින් සිටින වීඩියෝ ඇමතුම් සේවාවක් වන ස්කයිප්, මැයි මාසයේ සිට වසා දමන බව එහි හිමිකරු වන මයික්‍රොසොෆ්ට් සමාගම පවසනවා.
මෙම වසරේ මැයි මාසයේ සිට සිය මෙහෙයුම් නවත්වනු ඇති බවත්, ඉදිරි දින කිහිපය තුළ පරිශීලකයින්ගේ කතාබස් සහ සම්බන්ධතා සමග පරිශීලකයින්ගේ ස්කයිප් ගිණුම සමග Microsoft Teams Free වෙත සම්බන්ධ විය හැකි බවත්, ස්කයිප් සමාගම සිය X ගිණුමේ සටහනක් තබමින් සඳහන් කර තිබෙනවා.
ඒ අනුව පරිශීලකයින්ගේ ස්කයිප් මුරපද සමග Microsoft Teams Free සම්බන්ධ වීමට හැකියාව ලැබෙනු ඇත.
2003 දී ප්‍රථම වරට නිකුත් කරන ලද ස්කයිප්, 2011 දී මයික්‍රොසොෆ්ට් සමාගම විසින් ඩොලර් බිලියන 8.5 කට මිලදී ගන්නා ලද අතර, එය එකල එහි විශාලතම අත්පත් කර ගැනීම එය බවද වාර්තා වෙනවා.
ස්කයිප්, කලක් ලෝකයේ වඩාත්ම ජනප්‍රිය වෙබ් අඩවි වලින් එකක් වූ අතර, ලොව පුරා සිටින මිතුරන්ට සහ පවුලේ අයට තම පරිගණක හරහා නොමිලේ වීඩියෝ සහ ඕඩියෝ ඇමතුම් ලබා ගැනීමට මිනිසුන්ට අවකාශය සැලසුනා.
ස්කයිප් මෙම සේවාව ලබා දුන් පළමු හෝ එකම සමාගම නොවූවත්, පරිශීලකයින්ට පරිගණකයෙන් පරිගණකයට නොමිලේ ඇමතුම් ලබා ගැනීමට ඉඩ දීමෙන් එය ජනප්‍රිය කිරීමට ද උපකාරී වුණා.
