දැඩි ආරක්ෂාවල් මැද ගත වෙන පාස්කු දිනය
ජේසුස් ක්රිස්තුස් වහන්සේගේ උත්ථානය සිහිපත් කරමින් ලොව පුරා කිතුනු බැතිමතුන් සමරනු ලබන පාස්කු දිනය අදට (20) යෙදී තිබෙනවා.
ජේසුස් ක්රිස්තුස් වහන්සේ සකල ලෝක වර්ගයා පාපයෙන් ගලවා ගැනීම සඳහා කුරුස ගස තුළ සිය ජීවිතය පූජාකර දින 03 කට පසු උත්ථානය ලැබීම පාස්කු මංගල්යය ලෙස කිතුණුවන් සමරනු ලබනවා.
ජේසුස් වහන්සේගේ දුක් විඳීම, මරණය සහ උත්ථානය සිහිපත් කරමින් කිතුනුවන් විවිධ වත් පිළිවෙත් අතර ගතකළ දින 40 ක චතාරික සමය ද පාස්කු ඉරිදා දිනයෙන් අවසන් වෙනවා.
බයිබලයේ සඳහන් වන්නේ ඊශ්රායලයේ ජෙරුසලම් අගනුවර කල්වාරි කන්දේ දී කුරුසියේ ඇණ ගසා මරණයට පත්කළ උන්වහන්සේ අද වැනි දිනක උත්ථාන වී සිය අනුගාමිකයින්ට දර්ශනය වූ බවයි.
අදට යෙදී තිබෙන පාස්කු මංගල්යය ශ්රී ලාංකික කිතුනු බැතිමතුන් ද ඉතා උත්කර්ෂවත් ලෙස සමරන ලබන බව කොළඹ අගරදගුරු පදවියේ සන්නිවේදන අධ්යක්ෂක ජූඩ් ක්රිෂාන්ත ප්රනාන්දු පියතුමා සදහන් කරනවා.
මේ අතර පාස්කු ඉරිදා වෙනුවෙන් පැවැත්වුණු මධ්යම රාත්රී දිව්ය පූජාවන් ඊයේ (19) රාත්රී දිවයිනේ සෑම දේවස්ථානයකම පැවැත්වුණු අතර, කොළඹ අගරදගුරු අති උතුම් මැල්කම් කාදිනල් රංජිත් හිමිපාණන් සහභාගී වූ විශේෂ දේව මෙහෙය ඊයේ රාත්රී කොටහේන ශාන්ත ලුසියා ආසන දෙව්මැදුරේ දී පැවැත්වුණා. එමෙන්ම අද දිනයේ ද දිවයිනේ සියලු දේවස්ථානයකම දිව්ය පූජාවන් පැවැත්වෙන බවද සදහන් වෙනවා.
මේ අතර, කතෝලික සහ අනෙකුත් ක්රිස්තියානි දේවස්ථානවලට පාස්කු ඉරුදින ත්රස්ත ප්රහාරය එල්ල වී හෙට දිනට වසර 06 ක කාලයක් ගත වනවා. 2019 අප්රේල් මස 21 වන දින එල්ල වූ එම ප්රහාරයෙන් පුද්ගලයින් 273 දෙනෙකු ජීවිතක්ෂයට පත්වූ අතර, තවත් පුද්ගලයින් 500 කට අධික පිරිසක් තුවාල ලැබුවා.
මේ අතර, පසුගිය 18 වන දිනට යෙදුණු මහසිකුරාදා දිනයේ සිට දිවයිනේ සියලු දේවස්ථාන සහ ඒ ආශ්රිතව විශේෂ ආරක්ෂාවක් යෙදවීමට කටයුතු කර ඇති බව පොලීසිය පවසනවා. ඒ සඳහා පොලිස් විශේෂ කාර්ය බලකායේ නිලධාරීන් සහ ත්රිවිධ හමුදාවේ නිලධාරීන් ද යෙදවීමට කටයුතු කර ඇති බවද පොලීසිය සඳහන් කරනවා.
